Ganiu mirëpret ambasadorin e Republikës së Shqipërisë në Maqedoninë e Veriut, ekselencën Fatos Reka
Ambasadori i Republikës së Shqipërisë në vend, Fatos Reka ka vizituar sot Komunën e Çairit ku ka realizuar takim me kryetarin Visar Ganiu. Kreu i Çairit, pas takimit ka deklaruar se si çdoherë bisedat me z. Reka janë produktive dhe me vizion tepër të qartë.
“Zhvillimi i Komunës sonë është prioriteti kryesor, andaj mysafirët i informova për rrjedhën e projekteve që janë në proces e sipër dhe planifikimet tona të ardhshme”, ka deklaruar Ganiu, për të shtuar se në takimin me Ambasadorin Reka fokusi është vendosur edhe në thellimin e bashkëpunimit mes Komunës së Çairit dhe Ambasadës shqiptare.
“Fokusin e vendosëm edhe në thellimin e bashkëpunimit midis dy institucioneve tona që jam i bindur se do të çojë drejt forcimit edhe më të madh të bashkëpunimit mes Komunës së Çairit dhe komunave shqiptare. Konstatuam se një proces i tillë kontribuon për ruajtjen dhe zhvillimin e raporteve gjithnjë të shkëlqyeshme të qytetarëve nga të dyja anët e kufirit, sikurse edhe bashkëpunimin institucional ndërkufitar”, ka thënë Ganiu.