1 Shtatori – fillimi i vitit të ri shkollor
Sot 918 nxënës u ulën për herë të parë në bankat mësimore nëpër 9 shkollat komunale të Çairit . Shënimin e fillimit të procesit mësimor në Komunën e Çairit, kryetari Visar Ganiu e ndoqi bashkë me ministrin e Arsimit, Jeton Shaqiri, drejtoreshën e Shkollës “Vasil Gllavinov”, Elita Demiri, arsimtarë, prindër dhe nxënës.
Ai dha informacionin se nga sot në shkollat fillore komunale të Çairit mësimin e ndjekin 8.272 nxënës dhe sipas informacioneve që vazhdimisht arrijnë nga drejtorët e shkollave dhe departamenti i arsimit, ky proces ka qenë tejet i mbarë.
“Andaj të dashur nxënës dua vetëm t’ju uroj shumë e shumë suksese në rrugën e diturisë, që është e vetmja rrugë e cila mund të na sigurojë dritën e vërtetë të ardhmërisë. Kuptohet, suksese edhe juve mësimdhënës sepse jeni shtylla e vërtetë që e mbanë të sigurt shoqërinë tonë”, ka thënë me këtë rast Visar Ganiu, kreu i Komunës së Çairit.
Ai tha se këtë vit shkollor po e fillojmë më të përgatitur se kurrë, qoftë përmes kushteve gjithnjë e më të mira mësimore, apo infrastrukturës shkollore.
“Po e nisim me investime dhe punime të realizuara në secilën shkollë tonën komunale- “Jashar Bej Shkupi”, “Vasil Gllavinov”, “Hasan Prishtina”, “Liria”, “Imri Elezi” “ Ismail Qemali”, “Kongresi i Manastirit”, “7 Marsi”,“Tefejuz””, ka shtuar Ganiu.