Komuna e Çairit ndanë 600.000 denarë për të prekurit nga tërmeti katastrofik në Turqi
Shkup, 14 shkurt – Komuna e Çairit sot ndau 600.000 denarë ndihmë financiare për të prekurit nga tërmeti katastrofik në Turqi. Kjo ndihmë që vije me propozim të kryetarit të Komunës së Çairit, Visar Ganiu dhe i miratuar njëzëri nga këshilltarët e Këshillit Komunal të Çairit në një mbledhje të jashtëzakonshme, do të transferohet në konton e drejtpërdrejtë të shtetit turk që është hapur enkas për tërmetin.
Ganiu tha se ajo që ndodhi në Turqi na preku të gjithëve thellë në zemër dhe se tanimë 8 ditë të gjithë po përjetojmë dhimbjen e njëjtë me ata që humbën më të dashurit, humbën nënat, baballarët, gratë, burrat fëmijët, motrat e vëllezërit e tyre, humbën farefisin, humbën mbi 40 mijë bashkëqytetarë.
“Dëshmitë për pasojat janë të trishta qytete të tëra janë prekur nga kjo katastrofë natyrore. Por dëshmitë edhe më shumë i përjetova dje kur u kthyen zjarrfikësit vullnetarë të Shoqatës Bajram Miftari nga Çairi dhe unë shkurt takova shefin e këtij njësiti Artan Demiri, në sytë e të cilit pash gjithë atë dhimbje, gjithë atë mërzi që kishin parë e ndjerë deri sa po ndihmonin në aksionin e shpëtimit për të mbijetuarit e tërmetit katastrofal”, tha Ganiu.
Ai ka thënë me këtë rast se është plotësisht i vetëdijshëm se ska para që mund ta shlyej dhimbjen shpirtërore për humbjen e jetëve të njerëzve, megjithatë për momentin secila ndihmë do të jetë e mirëseardhur për të gjallit që kanë ngelur dhe për të rimëkëmbur jetën e tyre, për të rimëkëmbur vatrën e tyre, qytetin e tyre.
“Mjetet do të sigurohen nga Buxheti i Komunës së Çairit programi AO 412110, pra rezervat ekzistuese, gjegjësisht harxhime të paparashikueshme dhe do të transferohen në konton e drejtpërdrejtë të shtetit turk që është hapur enkas për tërmetin”, sqaroi kryetari i Çairit, Visar Ganiu.
Nga ana tjetër ai përkujtoi se si Komunë, Çairi në koordinim me shoqatat humanitare që veprojnë në territorin e saj, tanimë kanë nisur drejt rajoneve turke të goditura nga tërmeti edhe ndihmë në gjësendet më të nevojshme në raste të katastrofave të tilla. Ganiu falënderoi edhe njëherë heronjtë e vërtetë nga Çairi dhe që morën pjesë drejtpërdrejtë në aksionin e shpëtimit në Turqi, pjesëtarët e Shoqatës së zjarrfikësve Vullnetarë “Bajram Miftari”.