Në një atmosferë të denjë për rëndësinë e aktit, mes duartrokitjesh të fuqishme dhe emocioneve të sinqerta, Komuna e Çairit organizoi një ceremoni solemne për shpalljen “Qytetarë Nderi” të z. Joseph John DioGuardi dhe znj. Shirley Cloyes DioGuardi – dy figura me kontribut të jashtëzakonshëm për çështjen shqiptare në arenën ndërkombëtare.
Ngjarja u zhvillua në prani të Zëvendëskryeministrit të Parë të Qeverisë së Maqedonisë së Veriut, z. Izet Mexhiti, si dhe një numri të konsiderueshëm ministrash, zëvendësministrash, deputetësh, kryetarësh komunash dhe përfaqësuesish të institucioneve të ndryshme shtetërore dhe lokale. Ceremonia u kthye në një dëshmi të qartë të vlerave që Çairi afirmon në vazhdimësi: respektin institucional, mirënjohjen për përkrahësit e çështjeve kombëtare dhe kujdesin për ruajtjen e kujtesës historike.
Kryetari i Komunës së Çairit, z. Visar Ganiu, theksoi rëndësinë e këtij akti, duke deklaruar:
“Me shpalljen e z. DioGuardi dhe znj. Cloyes DioGuardi si Qytetarë Nderi, ne nuk i nderojmë vetëm për të kaluarën e tyre të lavdishme, por përcjellim një mesazh të qartë brezave të rinj – se miqësia e sinqertë, qëndrimi i drejtë dhe përkushtimi për të vërtetën, janë vlera që nuk harrohen.”
Për shqiptarët, ky akt nuk përfaqëson thjesht një vlerësim simbolik – por një gjest të thellë falënderimi kombëtar ndaj dy personaliteteve që i dhanë zë të drejtës shqiptare në momentet më të vështira të historisë moderne. Përmes kësaj ceremonie, Komuna e Çairit afirmoi edhe njëherë rolin e saj si institucion që vlerëson kontributin përtej kufijve, në funksion të drejtësisë, dinjitetit dhe historisë së përbashkët.
