Në hapësirat e Komunës së Çairit u zhvillua një trajnim profesional për mësimdhënësit e gjuhës shqipe dhe të grupit klasor nga të gjitha shkollat fillore komunale.
Trajnimi u organizua nga Sektori i Arsimit në Komunën e Çairit, në bashkëpunim me prof. dr. Ajten Hajdari-Qamili, dhe kishte për fokus përmirësimin e zbatimit të shqipes standarde në mësimdhënie, si dhe avancimin e metodave bashkëkohore të punës në klasë.
Në këtë proces u përfshinë rreth 200 mësimdhënës, të cilët përmes ligjëratave dhe ushtrimeve praktike trajtuan çështje të drejtshkrimit, drejtshqiptimit dhe përdorimit të teknologjive në mësimdhënie, me qëllim forcimin e kompetencave profesionale.
Ky angazhim përbën një hap konkret në drejtim të ngritjes së cilësisë së arsimit në nivel lokal, duke reflektuar përkushtimin e Komunës së Çairit për mbështetje të vazhdueshme ndaj mësimdhënësve dhe zhvillimit të procesit arsimor.



