Shkolla Fillore “Teffejuz” festoi 135 vjetorin e ekzistencës së saj. Ganiu uroi nxënësit dhe misionarët e arsimit të kësaj shkolle

Shkolla Fillore “Teffejuz” që nga viti 1884 kur filloi me punë është vatër shumë e çmuar e diturisë nga ku janë edukuar dhe kanë filluar rrugëtimin e dijes gjenerata të shumta që më pastaj në vitet e jetës janë vënë në shërbim të përparimit të vendit tonë.

Në manifestimin për shënimin e ditëlindjes së kësaj shkolle që është simboli më i mirë i bashkëjetesës mes kulturave të ndryshme që i bashkon një mision – drita e diturisë, Kryetari i Komunës së Çairit Visar Ganiu shprehu mirënjohje të thellë ndaj sakrificës e përkushtimit të shumë misionarëve të arsimit përgjatë viteve të funksionimit të kësaj shkolle dhe urimet e tij të përzemërta ndaj udhëheqësisë së shkollës.